Cheekhain…
Posted on 29. Sep, 2011 by Ali Abbas in Todays Thought
kamray ki sab he khirkian band theen… roshni madhum suron main darwazay ki oat say dakhil ho rahi thi… sehmi sehmi si… khamosh kay jesay koi dar tha… sakoot ka pehra charon ore chahya hwa tha… samnay ki traf ik table per kharab hwa computer rhka tha… jiss k agay ik tooti hwi kursi rakhi thi… kamray kay doosri taraf ik almari thi jis kay pat khulay hway thay… aur ander bikhray kapron ka dhair saaf dikhai daita tha… kamray kay dramyan ik lakri ka bistar tha jisper ik maili si chadar bichi thi.. buss yehi iss kamray ka qul asasa tha… wo bistar par neem daraz tha … neeli jeans aur grey tshirt… baal uljhay hway… aur ankhain laal… shayad raat kay kisi bhi pehar wo sakun say so nahi paya tha… chehray par kisi gehray sadmay kay asaar numayan thay.. mager khushk ho chukay anso’on ki lakeer dekhai na deti thi… shayad wo roya nahi tha… kamsay kam uss waqt tak tou nahi… hath bistar say latkaye hway tha… unglion nay mazbooti say ik mobile phone ko jakar rakha tha… uski ankhain band theen mager wo so nahi raha tha… wo kuch yaad bhi nahi kar raha tha… uska dil jazbat say… ehsasat say khali tha… aisa nahi tha kay ussay haqeqat ka pata na tha… mager buss wo haqeqat ka samna nahi kerna chahta tha… kab tak wo zindagi say.. sachai say mun phairay rahega… iska andaza ussay khud bhi nahi tha… kia wo kisi intezar main tha? shayad… mager kis cheez ka intezar? yeh usko maloom nahi tha… zindagi say bezar tha… ussay har ik shakhs.. har ik cheez say koft ho chuki thi… ukta gaya tha wo… wo dewana tou nahi tha… aqal o shaoor rkhta tha… phir kiun usnay khilwat ka libada ourh rakaha tha…
mobile kay screen per roshni namoodar hwi… yeh kisi khaber ki amad thi… ya shayad kisi kay rukhsat honay ka sandaisa… uss nay ankhain kholeen… aur screen ki taraf nigah jama di… “1 new message”… ussay maloom tha message kiska tha… aur uss main kia likha tha… ussay yunn laga jesay uski rooh or jisam ka taluq khatam ho raha hai… wo ik lamhay kay liye ruka… yeh ik lamha jo sadioon par muheet tha.. phir thandi aah bhar kay.. kanpti unglion say usnay “view” ka button dabaya… screen per teen alfaz likhay thay… jo mil kar ik naam banta tha… usnay wo naam parha… ussi waqt kuch tootnay ki zor dar awaz aye… badal garjay… maujon main taltum aya… ik tofaan ubhra… ussay apnay seenay main gard ka ik ghubar jamta nazar aya… dil main ik tees si mehsus hwi… jaisay kisi nay current lagaya ho… aur phir ankhon kay agay nami agae… wo band jo najany kabsay bandha hwa tha… toot gaya… aur ik akela qatra uski ankh say jari hokar… takiye main jazb hogaya… uska dimagh sunn ho chala tha… aur jisam ikdum sakit… zindagi kay asar kahen na thay… siwaye uski ankhon kay… jo ab behtay darya ka manzar paish ker raheen theen… uss naam ko wo musalsal dekhay ja raha tha.. aur jitna daikhta utna he ussay lagta jesay uss kay dil main ik gehra zakhm par raha hai… aisa zakhm jo bhar tou jaega… mager apna nishan zarur chordaiga… samnay screen per likha tha “**** ***** *****” mobile hathon say gir gaya…
uss kay jisam main ab jan baki nahi thi… wo khudko buhat kamzor mehsus ker raha tha… shikast khorda… uss kay pooray wajood main ik kap kapi tari thi… unhe larkharatay qadmon say wo bathroom ki janab barha… kuch kehnay kay lye usnay munn khola… mager alfaz kay bajaye ik holnka awaz nikli… aur uss kay sath sath qai bhi… usnay raat say kuch khaya na tha lehaza ulti main kuch bhi na nikla… takleef kuch mazeed barh rahi thi… usnay ik hath seenay per rkha aur pani ka null khol dia.. munn dhotay waqt usnay akhain band he rakheen… wo khudsay nazrain nahi mila skta tha… ya shayad khud ko iss halat main dekhna nahi chahta tha… bahar aker usnay kapray tabdeel kiye… ik robot ki terhan uska jisam khud he ik ik baad ik kam anjam day raha tha… kuch tha jo uss kay seenay main atak gaya tha… wo uskay andar ki awaz thi shayad… wo buhat kuch kehna chahta tha… mager alfaaz ko tarteeb nahi day pa raha tha… ussay laga jaisay koi uss kay andar musalsal cheekh raha hai… mager har bar cheekh lab par anay say pehlay he wo uska gala gonth daita… tyar honay kay baad usnay gira hwa mobile uthaya aur taizi say jaib main rakh lia… sar main shadeed dard tha… aur chakar bhi arahay thay… ik sec kay liye usnay socha office na jaye… mager dosray he lamhay khud ki nafi kari… gari ki chabi utha kay wo ghar say bahar nikla aur office kay lye nikal para… wo cheekhain jo uss kay seenay main buland howi theen… waheen qaid ho kay reh gayeen…
Rida
Sep 29th, 2011
1 lamhay ko achy say Qalm band keya hay, but kafi rug kat nahi hay
Ali Abbas
Sep 29th, 2011
shukria rida … jee rugg kaat tou hai.. kia kar sktay hain : )
not imp
Sep 29th, 2011
@rida.. qabar ka haal murda he janta hai
moosa
Sep 29th, 2011
ROFL….
sahi baat hai 
moosa
Sep 29th, 2011
sub choro… ye language ki tight khichri maari hai.. Urdu English Hindi… Kiya tou starplus Talent hai
Ali Abbas
Sep 29th, 2011
@moosa: its okay, I know you are unable to positively appreciate anything. You have your own stories to tell.
PS: there is NO hindi word in the entire post.
Heeri
Sep 30th, 2011
qasam se, sab se zyada curiosity mujhay un starrred words ki hai jo message view kernay per dikhay :p :p
bata day bhaiiii k kiya thayyyyyyy pleaseeeeeeeeeee!
joke apart
good write up!
moosa
Sep 30th, 2011
ore, sandaisa etc sorry bro agr ye hindi words nahi tou i guess filmo dramo mai ye log ab urdu bolna shuru hogaye hain… :S
n on positively appreciating things…
koi positive cheez ho to positively appreciate karun na 
Ali Abbas
Sep 30th, 2011
@hira: wo naam he tou nahi batana..
@moosa: hm
Munis
Sep 30th, 2011
Very intense man , I wish this was in Urdu font though ! plus the expressionist painting "The Scream" goes very well along with this post!
Ali Abbas
Sep 30th, 2011
@munis: yes i have been told by another friend that the impact would have been better if the post was in urdu font, will try and arrange for that. The painting was the first thing that came to my mind for the pic
razeen
Jun 23rd, 2012
okkk Ali…so this has to be one of ur finest outbreaks….very well done!
ab agay…. 6 saal baad:
mujhay kisi ka naam yaad nahin..mujhay sirf wo perchain yaad ha jis ki wajah se mere zindagi ka tawazun bigra..mujhay koi waqia awaz nahin deta per mujhay aj tuk us ki cheekhain sunain detin hain..mujhay ye tu yaad hai k aisa kuch hua jo takleef-de tha, mager wo kis ne kiya, kya hua, kaisay hua..mujhay kuch yaad nahin. Aisa nahin k mere yaad-dasht kamzore hai per saari science healing main hai. Zakhm lug jayay tu jild apnay apko doobara reform ker leti hai..Ye qudrut ka asool hai. reh jata hai tu sirf aik daagh. Zakhm ki yaadgaar – mager us ki kahani yaad nahin rehti..
…i hope u get it n bear ma roman
ali488
Jun 23rd, 2012
thank you very much for the appreciation Razeen. Yes I understand what you have implied and although I do not agree with all that has been said, I do agree that wounds heal.. and scars are formed.